భవిష్యత్తు సోషలిజానిదే... !

• ప్రజా ఉద్యమాలను బలోపేతం చేయాలి
• కేపిటలిజం దుర్మార్గానికి తెర దించాలి
• కమ్యూనిస్టు పార్టీల ప్రపంచ మహాసభ ప్రకటన

            పెట్టుబడిదారీ వ్యవస్థ తాత్కాలికంగా ఆధిపత్యం కొనసాగించినా అంతిమంగా భవిష్యత్తు సోషలిజానిదేనని ఇక్కడ ముగిసిన కమ్యూనిస్టు పార్టీల ప్రపంచ మహాసభ ఉద్ఘాటించింది. ఈ నెల 9-11 తేదీల మధ్య ఏథెన్స్‌లో జరిగిన ఈ మహాసభలకు ప్రపంచవ్యాప్తంగా 61 దేశాల నుండి 78 పార్టీలకు చెందిన దాదాపు 400 మందికి పైగా ప్రతినిధులు హాజరై వివిధ అంశాలపై చర్చలు జరిపారు. ఈ మహాసభల్లో పాల్గొనలేకపోయిన దేశాల కమ్యూనిస్టు పార్టీలు తమ సందేశాలను పంపాయి. సోవియట్‌ యూనియన్‌ పతనం తర్వాత గత 20 ఏళ్లలో ప్రపంచవ్యాప్తంగా కమ్యూనిస్టులు ఎదుర్కొన్న అనుభవాలు, ప్రస్తుత అంతర్జాతీయ పరిస్థితులు ప్రధానంగా చర్చల్లో ప్రస్తావనకు వచ్చాయి. పెట్టుబడిదారీ వ్యవస్థ ఎదుర్కొంటున్న సంక్షోభ పరిస్థితులు, సామ్రాజ్యవాద దురాక్రమణ యుద్ధాల వంటి పరిణామాలు ఎదురవుతున్న ప్రస్తుత పరిస్థితుల్లో ప్రజానుకూల అంతర్జాతీయతా వాదాన్ని, సామ్రాజ్యవాద వ్యతిరేక కూటమిని బలోపేతం చేయటం ద్వారా పెట్టుబడిదారీ వ్యవస్థను కూలదోసి సామ్యవాద వ్యవస్థను నిర్మించాలని ఈ మహాసభలు తమ తుది ప్రకటనలో పిలుపునిచ్చాయి. 2008లో సావోపౌలో (బ్రెజిల్‌), 2009లో న్యూఢిల్లీ (భారత్‌), 2010లో ష్వేన్‌ (దక్షిణాఫ్రికా)లలో జరిగిన 10, 11, 12 వ అంతర్జాతీయ కమ్యూనిస్టు పార్టీల మహాసభలు విశ్లేషించి జారీ చేసిన ప్రకటనల్లోని అంశాలను ప్రస్తుత ప్రపంచ పరిస్థితులు ప్రతిబింబిస్తున్నాయని ఈ మహాసభలు తమ ప్రకటనలో వివరించాయి.

                     ప్రస్తుతం పీకల్లోతు సంక్షోభంలో కూరుకుపోయిన పెట్టుబడిదారీ వ్యవస్థ కార్పొరేట్‌ నష్టాలను ప్రజలపై రుద్దుతూ ఉత్పాదక శక్తులను, వనరులను నాశనం చేస్తోందని, ఫ్యాక్టరీల మూసివేత ద్వారా అనేక మందిని రోడ్లపాలు చేస్తోందని ఈ మహాసభ ఆవేదన వ్యక్తం చేసింది. ప్రస్తుతం కార్మికుల సంఘటిత హక్కులు, వేతనాలు, పెన్షన్లు, సామాజిక భద్రత వంటి వాటిపై జరుగుతున్న దాడులను సమర్ధవంతంగా తిప్పికొట్టేందుకు ప్రజా ఉద్యమాలను బలోపేతం చేయాలని పిలుపునిచ్చింది. అనేక దేశాల్లో ప్రజాతంత్ర హక్కులపైన, సార్వభౌమత్వంపైనా దాడులు పెరిగిపోతున్నాయని, రాజకీయ వ్యవస్థలు మరింత క్రియాశీలకంగా మారుతూ కమ్యూనిస్టు వ్యతిరేకతను పెంచిపోషి స్తున్నాయని తెలిపింది. ఈ పరిస్థితుల్లో పశ్చిమాసియా, ఉత్తరాఫ్రికా వంటి ప్రాంతాల్లో ప్రజా వ్యతిరేక ప్రభుత్వాలకు వ్యతిరేకంగా ఎగసిపడిన ఉద్యమాలకు సారథ్యం వహించిన ప్రజలకు, కార్మికులకు మహాసభ అభినందనలు తెలియచేసింది. లిబియాపై నాటో, ఐరోపా కూటమి దేశాలు కొనసాగించిన సామ్రాజ్యవాద దురాక్రమణను మహాసభ తీవ్రంగా ఖండించింది. వ్యవస్థల్లో పెరుగుతున్న వైరుధ్యాలను సమర్ధవంతంగా వినియోగించుకుని ప్రజాతంత్ర హక్కుల పరిరక్షణ కోసం కార్మిక, ప్రజా ఉద్యమాలను బలోపేతం చేసేందుకు కమ్యూనిస్టు, వర్కర్ల పార్టీలు చారిత్రాత్మక పాత్ర పోషించాల్సిన అవసరాన్ని ప్రస్తుత పరిణామాలు మరోసారి ధ్రువీకరిస్తున్నాయని తెలిపింది.

                   ఈ క్రమంలోనే ఇప్పుడు అంతర్జాతీయంగా పునరేకీకరణలు కొనసాగుతున్నాయని, అమెరికా వంటి పెట్టుబడిదారీ వ్యవస్థలు క్రమంగా బలహీన పడుతుండగా చైనా వంటి దేశాలు ప్రబల ఆర్థిక శక్తులుగా ఎదుగుతుండటమే ఇందుకు నిదర్శనమని వివరించింది. పెట్టుబడిదారీ వ్యవస్థ దుర్మా ర్గానికి తెర దించేందుకు కార్మిక, కర్షక, శ్రామిక శక్తులు, గ్రామీణ పేదలు, మహిళలు ఏకమై ప్రజాపోరాటాలను మరింత బలోపేతం చేయాలని ఈ మహాసభ పిలుపునిచ్చింది. భవిష్యత్తు సోషలిజానిదేనని ఈ ప్రకటన పునరుద్ఘాటించింది. 

                                ( ప్రజాశక్తి సౌజన్యంతో.....  )