సీపీఐ జాతీయ సారథ్య బాధ్యతలను చేపట్టిన తెలుగువారు

  సీపీఐ జాతీయ ప్రధాన కార్యదర్శిగా సురవరం సుధాకర్ రెడ్డి ఎన్నికయ్యారు. పాట్నాలో జరిగిన సీపీఐ (భారత కమ్యూనిస్టు పార్టీ)21వ జాతీయ మహాసభల్లో బర్థన్ స్థానంలో ఆయన్ని పార్టీ ప్రతినిధులు ఎన్నుకున్నారు. జాతీయ రాజకీయ చిత్రంపై మరోసారి ఓ తెలుగువారిని ఉన్నతమైన పదవి వరించింది. 24ఏళ్ళ తర్వాత సీపీఐ సారథ్య బాధ్యతలను చేపట్టిన తెలుగువారిగా సురవరం చరిత్ర సృష్టించారు.

    సుదీర్ఘ కమ్యూనిస్టు ఉద్యమ నేపథ్యం కలిగిన సురవరం మహబూబ్‌నగర్‌ జిల్లాకు చెందినవారు.  సమరశీల రాజకీయ కార్యకర్త, మేధావి, మంచి వక్త.  2008 మార్చి నుండి పార్టీ ఉపప్రధాన కార్యదర్శిగా బాధ్యతలు నిర్వహిస్తున్నారు. అప్పటికి ఆయన భారత కమ్యూనిస్టు పార్టీ ఆంధ్రప్రదేశ్‌ రాష్ట్ర సమితి కార్యదర్శిగా, జాతీయ సమితి కార్య వర్గ సభ్యులుగా వున్నారు.

            సురవరం నల్గొండ నుంచి 1998లో తిరిగి 2004 ఎన్నికల్లో లోక్‌సభకు ఎన్నికై ప్రతిభావంతుడైన పార్లమెంటేరియన్‌గా గుర్తింపు పొందారు.

ప్రజావ్యతిరేక విధానాలు, అవినీతిపై వామపక్షాలే పోరాడుతున్నాయి - ప్రకాశ్‌ కరత్‌

• సిపిఎం కేరళ రాష్ట్ర మహాసభల ముగింపు సభలో కరత్‌
• తిరువనంతపురంలో రెడ్‌ షర్ట్‌ వాలంటీర్ల భారీ కవాతు
• కార్యదర్శిగా పినరయి తిరిగి ఎన్నిక

             సిపిఎం కేరళ రాష్ట్ర మహాసభల ముగింపు ఈ సందర్భంగా సభకు ముఖ్య అతిధిగా హాజరైన పార్టీ ప్రధాన కార్యదర్శి ప్రకాశ్‌ కరత్‌ మాట్లాడుతూ... దేశంలో ప్రజావ్యతిరేక విధానాలు, అవినీతిపై పోరాడుతోంది వామపక్షాలు మాత్రమేనని చెప్పారు. ప్రజలు కూడా ఈ విషయాన్ని గుర్తించారన్నారు. లౌకిక, ప్రజాతంత్ర శక్తులతో ప్రత్యామ్నాయాన్ని ఏర్పాటు చేసేందుకు సిపిఎం చొరవ తీసుకుంటుందని చెప్పారు. మూడేళ్ల యుపిఎ-2 పాలనలో ధరల పెరుగుదల, నిరుద్యోగిత తీవ్రమైందని విమర్శించారు. ప్రజావ్యతిరేక నయా ఉదారవాద విధానాల వల్ల వేలాది మంది అన్నదాతలు బలవన్మరణాలకు పాల్పడుతున్నారని చెప్పారు. ఆంధ్రప్రదేశ్‌లో ఒక్క జనవరిలోనే 160 మంది రైతులు ఆత్మహత్యలకు పాల్పడ్డారని ఆయన పేర్కొన్నారు. కేరళలో రైతుల ఆత్మహత్యలు తిరిగి ప్రారంభమయ్యాయని, ఊమెన్‌చాందీ అధికారంలోకి వచ్చినప్పటి నుంచి రాష్ట్రంలో 31 మంది బలవన్మరణాలకు పాల్పడ్డారని అన్నారు. 34 ఏళ్ల వామపక్ష ప్రభుత్వంలో బెంగాల్‌లో ఎన్నడూ వినని రైతు ఆత్మహత్యలు ఇప్పుడు వినిపిస్తున్నాయని, మమతా బెనర్జీ అధికారం చేపట్టాక ముడు పదులకు పైగా అన్నదాతలు బలయ్యారని అన్నారు. అనంతరం పార్టీ పొలిట్‌బ్యూరో సభ్యులు బృందా కరత్‌, కొడియేరి బాలకృష్ణన్‌, పినరయి విజయన్‌, సిపిఎం శాసన సభాపక్ష నేత విఎస్‌ అచ్యుతానందన్‌, ఆహ్వాన సంఘం ప్రధాన కార్యదర్శి కడకంపల్లి సురేంద్రన్‌ ప్రసంగించారు.

                      సిపిఐ(ఎం) కేరళ రాష్ట్ర 20వ మహాసభలు శుక్రవారం తిరువనంతపురంలో జరిగిన భారీ బహిరంగ సభతో ముగిశాయి. ముగింపు సందర్భంగా అశేష జనవాహినితో నిర్వహించిన భారీ ర్యాలీతో రాజధాని నగరం తిరువనంతపురం ఎర్ర సముద్రాన్ని తలపించింది. దాదాపుగా 3 లక్షల మంది ఈ ర్యాలీలో పాల్గొన్నారు. నగరంలోని ఐదు ప్రధాన రోడ్ల గుండా సాగిన ఈ ర్యాలీలో 25 వేల మంది రెడ్‌షర్ట్‌ వాలంటీర్ల కవాతు ప్రధాన ఆకర్షణగా నిలిచింది. ఆద్యంతం అత్యంత క్రమశిక్షణతో సాగి, కమ్యూనిస్టు ఉద్యమ బలాన్ని చాటిన ఈ ర్యాలీలు ఇ బాలానందన్‌ నగర్‌ (చంద్రశేఖరన్‌ నాయర్‌ స్టేడియం)లో కలిశాయి. రైతులు, వివిధ రంగాల కార్మికులు, వ్యవసాయ కార్మికులు, మహిళలు, యువజనులు, విద్యార్థులు, ఉద్యోగులు ర్యాలీకి పెద్ద ఎత్తున తరలివచ్చారు.

( ప్రజాశక్తి సౌజన్యంతో..... ) 

కాజేసింది కక్కించాలి - ప్రకాశ్‌ కరత్‌

• 2జిపై సుప్రీం తీర్పును స్వాగతిస్తున్నాం
• రైతుల ఆత్మహత్యల్లో ఆంధ్రప్రదేశ్‌దే అగ్రస్థానం
• బెంగాల్‌దీ అదే దారి
• వామపక్ష ప్రజాతంత్రమే ప్రత్యామ్నాయం
• సిపిఎం రాష్ట్ర మహాసభ ప్రారంభ సభలో ప్రకాశ్‌ కరత్‌

             కార్పొరేట్‌ అవినీతికారణంగా దేశం నఫ్టపోయిన మొత్తాన్ని ఆ సంస్థల నుండి వసూలు చేయాలని సిపిఎం ప్రధానకార్యదర్శి ప్రకాశ్‌కరత్‌ డిమాండ్‌ చేశారు.  ఖమ్మంలో సిపిఎం 23వ రాష్ట్ర మహాసభలను ప్రకాష్‌ కరత్‌ ప్రారంభించారు. ఈ సందర్భంగా ఆయన మాట్లాడుతూ అక్రమాలకు పాల్పడ్డ కార్పొరేట్‌ సంస్థలపై సుప్రీంకోర్టు ఇచ్చిన తీర్పును స్వాగతించారు. 2జి కుంభకోణంలో అక్రమాలకు పాల్పడ్డ కార్పొరేట్‌ సంస్థల లైసెన్స్‌లు రద్దు చేయాలంటూ ఇచ్చిన తీర్పును చారిత్రాత్మకమైనదిగా ఆయన అభివర్ణించారు. వాస్తవానికి సిపిఎం మొదటి నుండి డిమాండ్‌ చేస్తోందని చెప్పారు. 2జి స్పెక్ట్రమ్‌ కంభకోణంలో122 సంస్థలు అక్రమాలకు పాల్పడ్డాయని వాటి లైసెన్స్‌లు రద్దు చేయాలని తాము కోరినట్లుచెప్పారు. ట్రారుకూడా73 సంస్థల లైసెన్స్‌లు రద్దు చేయాలని కేంద్ర ప్రభుత్వానికి సూచించిందని తెలిపారు. అయితే, కేంద్ర మంత్రి కపిల్‌ సిబాల్‌ ఈ సూచనను తిరస్కరించిన విషయాన్ని ఆయన గుర్తుచేశారు. లైసెన్స్‌లు రద్దు చేస్తే కార్పొరేట్‌ సంస్థలకు ప్రభుత్వంపై నమ్మకం పోతుందని, పెట్టుబడులు పెట్టడానికి ముందుకురావని వాదించారని తెలిపారు. ఈ తరహా అవినీతిని దృష్టిలో ఉంచుకునే లోక్‌పాల్‌ పరిధిలోకి కార్పొరేట్‌ సంస్థలను తీసుకురావాలని తాము డిమాండ్‌ చేసినట్లు తెలిపారు. ఈ విషయాన్ని పరిగణలోకి తీసుకోకుండా కేంద్రం రూపొందించిన లోక్‌పాల్‌ బిల్లు వల్ల ఎటువంటి ప్రయోజనం లేదని ఆయన అన్నారు. లోక్‌పాల్‌ తోనే అవినీతిమొత్తం అంతమౌతుందన్న అభిప్రాయం కూడా సరికాదని చెప్పారు.

 

దోపిడీ వ్యవస్థలో మార్పు తేవటానికి ప్రజలు ముందుకు రావాలి - సీతారాం ఏచూరి

• సీతారాం ఏచూరి ఉద్ఘాటన
• భవిష్యత్తు అరుణ పతాకదే

                       ప్రస్తుతం దేశ ప్రజలకు కావల్సింది కార్పొరేట్‌, సామ్రాజ్యవాద అనుకూల విధానాలు కాదని, వామపక్ష ప్రజాతంత్ర విధానాలు అవసరమని సిపిఎం నేత సీతారాం ఏచూరి ఉద్ఘాటించారు. సిపిఎం హర్యానా రాష్ట్ర మహాసభల ముగింపు అనంతరం పట్టణంలోని హుడా పార్క్‌లో సోమవారం జరిగిన భారీ బహిరంగసభనుద్దేశించి ఆయన ప్రసంగిస్తూ ప్రస్తుతం కొనసాగుతున్న దోపిడీ వ్యవస్థలో మార్పు తేవటానికి ప్రజలు ముందుకు రావాలని పిలుపునిచ్చారు.  కొద్దిమంది పెట్టుబడిదారులకు కాక పేద, బడుగు, బలహీన వర్గాల కోసం మెరుగైన భారతాన్ని నిర్మించేందుకు సూచిక అని అభివర్ణించారు. ప్రస్తుతం అమెరికా, ఐరోపా వంటి అభివృద్ధి చెందిన దేశాల్లో కొనసాగుతున్న ఆర్థిక సంక్షోభాన్ని, పెట్టుబడిదారీ వ్యవస్థపై ప్రపంచ వ్యాప్తంగా కొనసాగుతున్న తిరుగుబాట్లను ప్రస్తావిస్తూ సోషలిజానికి మాత్రమే భవిష్యత్తు ఉందని స్పష్టం చేశారు. 'భవిష్యత్తు అరుణ పతాకదే తప్ప పెట్టుబడి దారులది కాదు' అన్నారు. చిల్లర వాణిజ్యంలో విదేశీ ప్రత్యక్ష పెట్టుబడులను అనుమతించటాన్ని, ప్రస్తుతం పార్లమెంట్‌లో పెండింగ్‌లో వున్న పెన్షన్‌ నిధుల నియంత్రణ (పిఎఘఆర్‌డిఎ) బిల్లును తాము తీవ్రంగా వ్యతిరేకిస్తున్నామని చెప్పారు.

స్వతంత్ర శక్తిగా ఎదగడమే లక్ష్యం - ప్రకాశ్‌ కరత్‌

• వామపక్ష, ప్రజాతంత్ర ప్రత్యామ్నాయానికై కృషి
• ఆర్థిక సంస్కరణలపై విశాల ప్రజా ఉద్యమం
• మతోన్మాదంపై పోరాటం కొనసాగిస్తాం
• ముసాయిదా రాజకీయ తీర్మానంలో సిపిఎం

'               ఎన్నికల వైఫల్యాలు, పార్టీకి అత్యంత బలమైన బెంగాల్‌లో జరుగుతోన్న దాడి నేపథ్యంలో ఇతర రాష్ట్రాల్లో పార్టీ ప్రభావాన్ని, పునాదిని విస్తరింప చేయడం అత్యంత ప్రధానం. పార్టీ స్వతంత్ర కార్యాచరణను పెంపొందించడం, విస్తరింప చేయడం ద్వారానే ఇది సాధ్యం. పార్టీ పెరుగుదలకు ఇదే కీలకం..' అని సిపిఎం ముసాయిదా రాజకీయ తీర్మానం పేర్కొంది. దేశంలో వామపక్ష, ప్రజాతంత్ర ప్రత్యామ్నాయం రూపకల్పనే లక్ష్యంగా రాజకీయ కార్యాచరణ ఉండాలని పిలుపునిచ్చింది. ఏప్రిల్‌ 4 నుండి 9 వరకూ పార్టీ అఖిలభారత మహాసభ కేరళలోని కోజికోడ్‌లో జరగనున్న విషయం తెలిసిందే. ఈ ముసాయిదా తీర్మానంపై సూచనలు,సవరణలను ఆహ్వానించారు. ఇటీవల కోల్‌కతాలో జరిగిన పార్టీ కేంద్ర కమిటీ సమావేశాల్లో ముసాయిదా రాజకీయ తీర్మానాన్ని ఆమోదించారు. శనివారం ఇక్కడ ఏర్పాటు చేసిన విలేకరుల సమావేశంలో పార్టీ ప్రధాన కార్యదర్శి ప్రకాశ్‌ కరత్‌, పొలిట్‌బ్యూరో సభ్యులు సీతారాం ఏచూరి, వరదరాజన్‌ ముసాయిదాను విడుదల చేశారు. ' పార్టీని దేశవ్యాప్తంగా బలోపేతం చేయాలని, స్వతంత్ర పాత్రను పెంపొందించాలని తీర్మానం పేర్కొంది. కాంగ్రెస్‌, బిజెపిలకు వ్యతిరేకంగా దేశంలో కలిసి వచ్చే రాజకీయ పార్టీలను అంశాల వారీగా సమీకరిస్తాం. వామపక్ష, ప్రజాతంత్ర ప్రత్యామ్నాయాన్ని ఏర్పర్చాలన్న దీర్ఘకాల లక్ష్యంలో ఇదీ భాగమే ' అని ఈ సందర్భంగా కరత్‌ వ్యాఖ్యానించారు. 2008లో జరిగిన పార్టీ మహాసభ అనంతరం జరిగిన ముఖ్యమైన అంతర్జాతీయ, జాతీయ పరిణా మాలను ముసాయిదాలో పొందు పర్చినట్లు చెప్పారు. ముసాయిదాలోని ప్రధాన అంశాలను ఆయన మీడియాకు వివరించారు. 2007-08లో ప్రారంభమైన అంతర్జాతీయ పెట్టుబడిదారీ సంక్షోభం కొనసాగుతోందన్నారు. ఫలితంగా అమెరికాతో పాటు యూరప్‌లోని పలు అభివృద్ధి చెందిన దేశాలు ఆర్థిక సమస్యలతో సతమతమౌతున్నాయని అన్నారు. సంక్షేమ కార్యక్రమాలపై ప్రభుత్వ కోతలు, నిరుద్యోగం పెరగడం ఈ దేశాలన్నింటిలోనూ ఉమ్మడిగా కనిపిస్తోందన్నారు. సంక్షోభం నేపథ్యంలో అభివృద్ధి చెందిన దేశాలన్నింటిలోనూ కార్మికులు, ఉద్యోగులు, యువత, విద్యార్థులు పెద్ద ఎత్తున పోరాటాల్లోకి వస్తున్నారని చెప్పారు. ఈ కాలంలో అరబ్‌ దేశాల్లోనూ పలు చోట్ల ప్రజాస్వామ్య ఉద్యమాలు పెల్లుబికాయని, ఈ పరిణామాలను తమకు అనుకూలంగా మార్చుకోవడానికి నాటో రూపంలో అమెరికా కుట్రలు చేస్తోందని వ్యాఖ్యానించారు. 

              లాటిన్‌ అమెరికా దేశాల్లోనూ వామపక్ష శక్తులు ఈ కాలంలో పుంజుకున్నాయన్నారు. ప్రపంచవ్యాప్తంగా పెట్టుబడిదారీ వ్యవస్థకు వ్యతిరేకంగా పోరాటాలు ఉధృతమయ్యేందుకు అనువైన పరిస్థితులు ఏర్పడ్డాయన్నారు. ' పెట్టుబడి దారీ వ్యవస్థకు ఇక తిరుగేలేదని సరిగ్గా రెండు దశాబ్ధాల క్రితం అన్నారు. ఇప్పుడు ఆ వాదన మసకబారుతోంది. పెట్టు బడిదారీ వ్యవస్థ మనుగడపైనే మేథావు లందరూ సందేహం వ్యక్తం చేస్తున్నారు. సోషలిజమే అజేయమన్న నినాదానికి ఇప్పుడు మరింత ప్రాధాన్యత ఏర్పడింది ' అని కరత్‌ వ్యాఖ్యానించారు.
( ప్రజాశక్తి సౌజన్యంతో..... )  
 

నవ భారతం నిర్మిద్దాం...

నవ భారతం నిర్మిద్దాం

• విద్యార్థులు, యువతకు పిలుపు
• భగత్‌సింగ్‌ వారసత్వాన్ని బలపర్చాలి
• ఎస్‌ఎఫ్‌ఐ బహిరంగసభలో సీతారాం ఏచూరి

                 నూతన భారతదేశాన్ని నిర్మించాల్సిన బాధ్యత విద్యార్థులూ, యువతపై ఉందని ఉమ్మడి ఉద్యమాలతోనే అది సాధ్యమవుతుందని ఎస్‌ఎఫ్‌ఐ మాజీ అధ్యక్షులు, పార్లమెంటు సభ్యులు సీతారాం ఏచూరి పిలుపునిచ్చారు. ఎస్‌ఎఫ్‌ఐ 19వ రాష్ట్ర మహాసభల సందర్భంగా సోమవారం కడపలో మున్సిపల్‌ క్రీడా ప్రాంగణం నుంచి పాత బస్టాండు వరకు విద్యార్థులు మహా ప్రదర్శన నిర్వహించారు. అనంతరం ఎస్‌ఎఫ్‌ఐ రాష్ట్ర అధ్యక్షులు ఎం సూర్యారావు అధ్యక్షతన జరిగిన బహిరంగసభలో ఏచూరి మాట్లాడుతూ కేంద్రంలోని యుపిఎ-2 ప్రభుత్వం దోపిడీ, దౌర్జన్య విధానాలను అవలంబిస్తోందని సోదాహరణంగా వివరించారు. ఈ మోసపూరిత విధానాలకు వ్యతిరేకంగా విద్యారి ్థలోకం పోరాడాలని కోరారు. అమెరికాలో వచ్చిన ఆర్థిక సంక్షోభం తీవ్రమైందనీ, వాల్‌స్ట్రీట్‌ ముట్టడి ఉద్యమం ప్రపంచవ్యాప్తంగా 1500 పట్టణాలకు వ్యాపించిన విషయాన్ని ఏచూరి ప్రస్తావిస్తూ మునుముందు పెట్టుబడిదారీ వ్యవస్థకు వ్యతిరేకంగా పోరాటాలు విస్తృతమౌతాయని తెలిపారు. దోపిడీ, దౌర్జన్యాలు లేకుండా పెట్టుబడిదారీ విధానం బతకలేదనీ, అందుచేత దానికి ప్రత్యామ్నాయం సోష లిజం తప్ప మరోటి లేదన్నారు. ప్రపంచంలో వస్తున్న పోరాటాలను అధ్యయనం చేయాలి... ఆ అవగాహనతో మన దేశ పరిస్థి తులను మార్చాలని కోరారు. నూతన భారత దేశాన్ని నిర్మించాలని ఏచూరి అన్నారు.

             దేశంలో నూటికి తొమ్మిది మంది మాత్రమే ఉన్నత విద్యకు చేరుకుంటున్నారని, అది 25 నుంచి 30 శాతానికి పెరిగితే ప్రపంచానికే నాయకత్వం వహించే సామర్థ్యం భారతీయులకూ ఉంటుంద న్నారు. విద్య అందించే బాధ్యత నుంచి ప్రభుత్వాలు తప్పుకుంటున్నాయని అన్నారు. 6-14 ఏళ్లలోపు పిల్లలందరికీ విద్య అందించాలని విద్యాహక్కు చట్టాన్ని అమల్లోకి తెచ్చింది. అలాగే విద్యతోపాటు, మధ్యాహ్న భోజనం, యూనిఫారమ్స్‌, ఉచితంగా పుస్తకాలు, పాఠశాలల భవనాలు, ఉపాధ్యాయుల నియామకాలు చేయాలనీ చట్టంలో ఉంది. ఈ చట్టం అమల్లోకి వచ్చి రెండేళ్లవు తున్నా నిర్దేశించుకున్న లక్ష్యాలు నెరవేరలేదన్నారు. విద్యాహక్కు చట్టాన్ని అమలు చేయడానికి ఏటా రూ.35వేల కోట్లు ఖర్చవుతాయని ప్రణాళికా సంఘం అంచనా వేసిందన్నారు. ఐదేళ్లపాటు అమలు చేస్తే రూ.1.75 లక్షల కోట్లు ఖర్చవుతాయని చెప్పారు. 2జి కుంభకోణం రూ.1.76 లక్షల కోట్లు అని, ఈ దోపిడీ అరికడితే విద్యాహక్కు చట్టాన్ని సమర్థవంతంగా అమలు చేయొచ్చని విశదీకరించారు. నిరక్షరాస్యతనేదే లేకుండా పోతుందన్నారు. ఎపిఎల్‌, బిపిఎల్‌తో సంబంధం లేకుండా అందరికీ ఆహార భద్రత కల్పించాలంటే ప్రతి కుటుంబానికీ నెలకు 35 కిలోల బియ్యం ఇవ్వాలని కేంద్రాన్ని కోరామని అన్నారు. యుపిఎ-2 సర్కారు నిర్లక్ష్యం వల్ల ఆహార భద్రత బిల్లే ఇంకా రూపొందించలేదు.

                  ఆహార భద్రత కల్పించాలంటే ఏటా రూ.88 వేల కోట్లు ఖర్చవుతాయని కేంద్రం అంచనా. 2జి కుంభకోణాన్ని ఆపితే రెండేళ్లపాటు అందరికీ ఆహార భద్రత కల్పించే అవకాశముండేది. కానీ పాలకులు ప్రజల సొమ్మును దోచుకుతింటున్నారని ఆయన విమర్శించారు. భగత్‌సింగ్‌ రాజకీయ స్వాతంత్య్రంతోపాటు ఆర్థిక స్వాతంత్య్రం కోసం పోరాడారని గుర్తు చేశారు. భగత్‌సింగ్‌ వారసత్వాన్ని బలపర్చాలని విజ్ఞప్తి చేశారు. మతం, కులం ఐక్యతను బలహీనపరుస్తున్నాయని ఆందోళన వ్యక్తం చేశారు. ఇది దేశ సమైక్యతకు ప్రమాదకరం. అందరికీ విద్య, ఉపాధి, ఆకలి చావులు లేని సమాజం కోసం ఉమ్మడిగా పోరాడాలని విద్యార్థులకు పిలుపునిచ్చారు. దోపిడీ, మతతత్వ రాజకీయాలను ఓడించడానికి వామపక్షాలతో కలిసి ఉమ్మడిగా పోరాడాల్సిన ఆవశ్యకతను వివరిస్తూ ఈ దిశగా నూతన భారత దేశాన్ని నిర్మిస్తారని ఆకాంక్షిస్తున్నామని ఏచూరి ఆశాభావం వ్యక్తం చేశారు.

నయా ఉదారవాద విధానాల వ్యతిరేకంగా ఉద్యమం : బిజు

             కేంద్ర ప్రభుత్వం అనుసరిస్తున్న నయా ఉదారవాద విధానాలకు వ్యతిరేకంగా ఉద్యమించాలని ఎస్‌ఎఫ్‌ఐ అధ్యక్షులు పికె బిజు పిలుపునిచ్చారు. నయా ఉదారవాద విధానాల వల్లే రైతు ఆత్మహత్యలు జరుగుతున్నాయని ఆందోళన వ్యక్తం చేశారు. ఈ విధానాలు అవలంబించడం వల్ల విద్యావైద్యంతోపాటు వ్యవసాయం కూడా దెబ్బతింటోందని విమర్శించారు. 2జి కుంభకోణంలో ఇప్పటికే రాజాజీ, కనిమొళిజీ జైలుకు వెళ్లారని, భవిష్యత్తులో చిదంబరంజీ, మరోజీ తీహార్‌ జైలుకు వెళ్తారని చెప్పారు.

                     ఈ కార్యక్రమంలో ఆహ్వాన సంఘం ఛైర్మన్‌, ఎమ్మెల్సీ డాక్టర్‌ ఎం గేయానంద్‌ , ఎస్‌ఎఫ్‌ఐ మాజీ అధ్యక్షులు వై వెంకటేశ్వరరావు, ఎస్‌ఎఫ్‌ఐ రాష్ట్ర కార్యదర్శి కె చంద్రమోహన్‌, ఎస్‌ఎఫ్‌ఐ జాతీయ సహాయ కార్యదర్శి శివదాసన్‌, మాజీ అధ్యక్షులు ఆర్‌.అరుణ్‌కుమార్‌ తదితరులు పాల్గొన్నారు.  
( ప్రజాశక్తి సౌజన్యంతో..... )  
 

అందరికీ ఇక్కట్లు...

• తృణమూల్‌ దుష్ట పాలన ఫలితం
•  ప్రకాశ్‌ కరత్‌ విమర్శ

                   పశ్చిమ బెంగాల్‌లో కొనసాగుతున్న తృణమూల్‌ కాంగ్రెస్‌ 'దుష్ట పాలన' సమాజంలోని వివిధ వర్గాల ప్రజలను తీవ్ర ఇక్కట్లకు గురి చేస్తోందని సిపిఎం ప్రధాన కార్యదర్శి ప్రకాశ్‌ కరత్‌ విమర్శించారు. ఈ నెల 17 నుంచి జరిగిన సిపిఎం కేంద్ర కమిటీ సమావేశాలు ముగిసిన అనంతరం శుక్రవారం ఆయన ఇక్కడ మీడియాతో మాట్లాడారు. పంటలను సేకరించడంలో బెంగాల్‌ సర్కారు వైఫల్యం కారణంగా అయినకాడికి అమ్ముకోవాల్సి రావడంతో రాష్ట్రంలో రైతుల ఆత్మహత్యలు పెరుగుతున్న పరిస్థితి ఏర్పడిందని తెలిపారు. గత లెఫ్ట్‌ఫ్రంట్‌ ప్రభుత్వం ఏర్పాటు చేసిన సేకరణ యంత్రాంగాన్ని తృణమూల్‌ ప్రభుత్వం విచ్ఛిన్నం చేసిందని అన్నారు. గ్రామీణ ఉపాధి హామీ పథకం ద్వారా గ్రామ ప్రాంతాల్లో ఉపాధి కల్పనలో వైఫల్యముందని తెలిపారు. తృణమూల్‌ నేతృత్వంలోని ప్రభుత్వం పంచాయతీలను పూర్తిగా స్తంభింపజేయడమే దీనికి ప్రధాన కారణమని కరత్‌ చెప్పారు. వాస్తవానికి అది పంచాయతీల పనిని నిలిపివేసిందన్నారు. 

                  మూతపడిన పరిశ్రమల్లోని కార్మికులను ఆదుకునేందుకు గత లెఫ్ట్‌ ప్రభుత్వం ఏర్పాటు చేసిన సహాయ పథకాన్ని తృణమూల్‌ సర్కారు నిలిపివేయడం రాష్ట్రంలోని తేయాకు తోటల్లో ఆకలిచావులకు దారితీసిందని తెలిపారు. రాష్ట్రంలో సిపిఎం, ఇతర వామపక్షాలపై ఇప్పటికీ దాడులు కొనసాగుతూనే ఉన్నాయని, ప్రజాతంత్ర హక్కులు ప్రమాదంలో ఉన్నాయని వివరించారు. ముఖ్యమంత్రి, ఇతర మంత్రులు ఎలాంటి విమర్శలనూ సహించలేని స్థితిలో ఉన్నారన్నారు. కేరళ మాజీ ముఖ్యమంత్రి విఎస్‌ అచ్యుతానందన్‌పై విజిలెన్స్‌ కేసుకు సంబంధించి అడిగిన ప్రశ్నలకు ఆయన జవాబిస్తూ కేరళలోని యుడిఎఫ్‌ ప్రభుత్వం అత్యంత అవినీతిపరులైన మంత్రులతో నిండి ఉన్నదని, అటువంటి సర్కారు నిజాయితీకి మారుపేరైన ప్రతిపక్షనేతను అప్రతిష్టపాలుచేసేందుకు ప్రయత్నిస్తోందని విమర్శించారు. ఈ అంశంపై తాము కేరళ ప్రజల్లోకి వెళ్లాలని నిర్ణయించినట్లు తెలిపారు. ప్రజల స్పందన ఎలావుంటుందో చూద్దామని కరత్‌ అన్నారు. ఏప్రిల్‌లో జరుగనున్న పార్టీ 20వ అఖిలభారత మహాసభల్లో ప్రవేశపెట్టేందుకు ఉద్దేశించిన రాజకీయ తీర్మానం, కొన్ని సైద్ధాంతిక సమస్యలపై తీర్మానంపై పార్టీలో అన్ని స్థాయిల్లో రెండు నెలల పాటు విస్తృత చర్చ జరుగుతుందని ఆయన చెప్పారు. ఈ తీర్మానం ముసాయిదాలను ఈ నెల చివరి నాటికి అందరికీ అందుబాటులోకి తెస్తామన్నారు.

ప్రజాశక్తి సౌజన్యంతో.....   
 

ప్రత్యామ్నాయ సంస్కృతిని నిర్మిస్తాం

• సినీ రంగంలో కమ్యూనిస్టులు, పిఎన్‌ఎం అద్వితీయ పాత్ర
• అభ్యుదయం ఎక్కడున్నా ఆహ్వానించాల్సిందే
• మహాసభల సీడీ ఆవిష్కరణ సభలో రాఘవులు

               సంగీత, సినీ, కళారంగాల్లో ప్రస్తుతమున్న స్థితికి భిన్నంగా ప్రత్యామ్నాయ సంస్కృతిని నిర్మించాలని సిపిఎం రాష్ట్ర కార్యదర్శి బివి రాఘవులు చెప్పారు. ప్రజలను చీల్చి, వారిలో వైషమ్యాలు పెంచేందుకు ప్రస్తుత సాహిత్యం ప్రయత్నించడం దురదృష్టకరమన్నారు. తెలుగు సినీరంగంలో కమ్యూనిస్టులు, ప్రజానాట్యమండలి అద్వితీయ పాత్ర పోషించినట్లు తెలిపారు. ఈ రెండూ లేకపోతే సినిమా రంగమే లేదన్నారు. కేవలం కమ్యూనిస్టులనేగాకుండా అభ్యుదయ భావాలు ఎక్కడున్నా, ఎవరి దగ్గరున్నా, వాటిని ఆదరించి, అభిమానించాల్సిందేనని చెప్పారు. ఫిబ్రవరి 2, 3, 4 తేదీల్లో ఖమ్మంలో జరిగే సిపిఎం 23వ రాష్ట్ర మహాసభను పురస్కరించుకుని గురువారం స్థానిక సుందరయ్య విజ్ఞాన కేంద్రంలో 'ఎత్తరా ఎర్రెర్రని పతాకం' అనే పాటల సిడి ఆవిష్కరణ సభ జరిగింది. మహాసభ ఆహ్వాన సంఘం అధ్యక్షుడు, సిపిఎం కేంద్ర కమిటీ సభ్యుడు తమ్మినేని వీరభద్రం అధ్యక్షతన జరిగిన ఈ కార్యక్రమంలో రాఘవులు సిడిని ఆవిష్కరించారు. సిపిఎం కేంద్ర కార్యదర్శివర్గ సభ్యుడు వి శ్రీనివాస రావు, తెలంగాణ సాయుధ పోరాట యోధు రాలు మల్లు స్వరాజ్యం, ప్రముఖ సినీ గేయ రచయితలు సుద్దాల అశోక్‌తేజ, చైతన్య ప్రసాద్‌, యాకూబ్‌, సంగీత దర్శకుడు యశోకృష్ణ, గాయకులు రాంకీ, లెనిన్‌, అరుణ్‌ సాగర్‌ తదితరులు పాల్గొన్నారు.
                 ఈ సందర్భంగా రాఘవులు మాట్లాడుతూ సాంస్కృతిక కళారంగాలు ప్రజలను చైతన్యవంతులుగా తీర్చిదిద్దటంలో కీలకపాత్ర పోషిస్తాయని చెప్పారు. అభ్యుదయాన్ని ముందుకు తీసుకుపోయే సాహిత్యాన్ని ఆహ్వానిస్తామని, ఆదరిస్తామని తెలిపారు. గతంలో సినీరంగంలో పనిచేసిన పెద్దలు, అభ్యుదయకాముకులు సాహిత్య రంగంలో మహత్తరమైన పాత్ర పోషించారని గుర్తు చేశారు. వారి స్ఫూర్తితో వర్ధమాన రచయితలు, కవులు మతాలు, కులాలకు అతీతంగా మానవత్వం, సోదరతత్వం, సౌభ్రాతృత్వాలను రంగరించి పాటలు రాయాలని సూచించారు. వేర్వేరు
వృత్తుల్లో స్థిరపడినప్పటికీ ప్రజా ఉద్యమాల కోసం కొంతమంది రచయితలు తమ సమయాన్ని వెచ్చించి పాటలు రాయడం అభినందనీయ మన్నారు. వేర్వేరు రంగాల్లో ఉండటం వల్ల ప్రజా కళలకు దూరంగా ఉంటున్నామంటూ కొంతమంది ఆవేదన వ్యక్తం చేస్తున్నారని, అయితే ఏ రంగంలో ఉన్నప్పటికీ అవి మన ఆశయానికి అడ్డుకాబోవని తెలిపారు. తమ పార్టీ మహాసభ కేవలం గత నాలుగేళ్ళుగా చేసిన ఉద్యమాలు, భవిష్యత్‌ కార్యాచరణ, రాజకీయ చర్చలకే పరిమితంగాకుండా సాహిత్య, సాంస్కృతిక, కళారంగాలనూ అంతర్భాగం చేస్తామని వివరించారు. మహాసభను పురస్కరించుకుని ఖమ్మంలో ఇప్పటికే వివిధ సాంస్కృతిక ప్రదర్శనలు జరుగుతున్నాయని తెలిపారు. వీటిలో పలువురు రచయితలు, కవులు పాల్గొంటున్నారని చెప్పారు. మూడు రోజులపాటు ప్రతినిధుల సభ, ఫిబ్రవరి నాలుగో తేదీన లక్షలాది మందితో భారీ బహిరంగ సభను నిర్వహిస్తామని చెప్పారు. రాష్ట్ర రాజకీయాలు అగమ్యగోచరంగా ఉన్న ప్రస్తుత తరుణంలో ప్రజా సమస్యలు పక్కకు నెట్టబడ్డాయని విమర్శించారు. వీటిని తిరిగి రాజకీయ అజెండాలోకి తీసుకురావడంపై మహాసభల్లో చర్చిస్తామని రాఘవులు చెప్పారు. 
ప్రజాశక్తి సౌజన్యంతో.....   

ప్రజా సమస్యలే ఎజెండా

• కాంగ్రెస్‌లో ముఠా కుమ్ములాటలు
• స్థానిక, పురపాలక ఎన్నికలు నిర్వహించాలి
• సిపిఎం రాష్ట్ర కార్యదర్శి బివి రాఘవులు

సిపిఎం రాష్ట్ర మహాసభల్లో ప్రజాసమస్యలే ఎజెండాగా చర్చించనున్నామని ఆ పార్టీ రాష్ట్ర కార్యదర్శి బివి రాఘవులు అన్నారు. ముషిరాబాద్‌లోని శేఖర్‌నగర్‌ (ఖషీష్‌ ఫంక్షన్‌హాల్‌)లో జరుగుతున్న సిపిఎం నగర 19వ మహాసభలకు ముఖ్యఅతిథిగా వచ్చిన ఆయన విలేకరులతో మాట్లాడారు. నిన్నటితో 23 జిల్లాల మహాసభలు పూర్తయ్యాయని, ఫిబ్రవరి 2-4 తేదీల్లో ఖమ్మంలో రాష్ట్ర మహాసభలు, ఏప్రిల్‌లో కేరళ రాష్ట్రంలోని కొచ్చిన్‌లో అఖిలభారత మహాసభలు జరగనున్నాయని తెలిపారు. రాష్ట్రంలో రాజకీయ పరిస్థితి అయోమయంగా, అస్తవ్యస్తంగా ఉందన్నారు. కాంగ్రెస్‌లో ముఠా కుమ్ములాటలు పరాకాష్టకు చేరాయన్నారు. జగన్‌ను బలహీనం చేయడానికి కాంగ్రెస్‌పార్టీ, కాంగ్రెస్‌ను బలహీనం చేయడానికి జగన్‌ ప్రయత్నాలు చేస్తున్నారే తప్ప ప్రజా సమస్యలను పట్టించుకోవడం లేదన్నారు. రాష్ట్రంలో రాజకీయ పరిస్థితి నాటకంలా కనిపిస్తోందని విమర్శించారు. ఇంత జరుగుతున్నా ఫలహారాల ప్రక్రియ మాత్రం కొనసాగుతూనే ఉందన్నారు. రాష్ట్ర మహాసభల్లో రాజకీయ పరిస్థితులు, ప్రజా సమస్యలను చర్చించనున్నామని తెలిపారు. ప్రజాసమస్యలను రాజకీయ ఎజెండా చేయడమే మహాసభల లక్ష్యమన్నారు. వామపక్షాలు, ప్రజాతంత్ర శక్తులను కలుపుకొని ఉద్యమాలు, పోరాటాలు నిర్వహించ నున్నామని తెలిపారు. హైదరాబాద్‌ మహానగరానికి కొత్తమేయర్‌ ఎన్నికయ్యారని, పురపాలక సంఘాలు, స్థానిక సంస్థల పాలకవర్గాలకు మాత్రం ఎన్నికలు నిర్వహించలేదని చెప్పారు.

         కాలపరిమితి ముగిసిన వెంటనే నిర్వహించాలని రాజ్యాంగంలో ఉన్నా రాజ్యాంగానికి విరుద్ధంగా అప్రజాస్వామికంగా కాంగ్రెస్‌పార్టీ వ్యవహరిస్తోందని విమర్శించారు. కోర్టు కేసు సాకుతో ఎన్నికలు నిర్వహించకుండా కాలయాపన చేస్తోందని, స్వార్థం కోసం, స్వలాభం కోసం కాంగ్రెస్‌పార్టీ అధికార దుర్వినియోగానికి పాల్పడుతోందని అన్నారు. ప్రజాప్రతినిధులు లేకపోవడంతో అధికారులను ఆసరాగా చేసుకొని పన్నులు వేసి ప్రభుత్వ ఖజానాను నింపుకోవడానికి సిఎం కిరణ్‌కుమార్‌రెడ్డి తీవ్రప్రయత్నాలు చేస్తున్నారని అన్నారు. సాకులు చెప్పకుండా తక్షణమే స్థానిక సంస్థలు, పురపాలక సంఘాల ఎన్నికలు నిర్వహించాలని డిమాండ్‌ చేశారు. పాలకవర్గాలు లేకపోవడం వల్ల ప్రభుత్వం ప్రజలపై భారాలు మోపుతోందని అన్నారు. ఇప్పటికే కొన్ని పురపాలక సంఘాల్లో ఆస్తిపన్ను, చెత్తపన్ను పెంచాయని, మరికొన్ని పురపాలక సంఘాల్లో ప్రతిపాదనలు పంపారని తెలిపారు. హైదరాబాద్‌లో నీటి పన్ను పెంచిందని తెలిపారు. పట్టణ ప్రాంతాల్లో పన్నులు వేసి భారాలు వేసేందుకు కేంద్ర ప్రభుత్వం రాష్ట్ర ప్రభుత్వానికి ప్రోత్సాహకంగా రూ.90 కోట్లు గ్రాంట్‌ ఇచ్చారని తెలిపారు. పట్టణ ప్రాంతాల్లో ప్రభుత్వం వేసిన భారాలకు వ్యతిరేకంగా సిపిఎం పోరాడుతోందని వివరించారు.

ప్రజాశక్తి సౌజన్యంతో.....  

ఈ తరం ముందున్న సవాళ్లు...

           ప్రపంచ సంపదను జనాభాలో కేవలం 15 శాతంగా వున్న సంపన్నులే అనుభవిస్తుంటే, మిగతా 85 శాతం మంది అల్లాడుతున్నారు. ఆర్థిక అంతరాలు విపరీతంగా పెరిగిపోయాయి. భూమండలమే ప్రమాదం అంచుకు చేరుకోబోతోంది. ప్రకృతిని సంపన్న దేశాలు తమ అవసరానికన్నా మించి వాడుకుని భూగోళం ఉనికికే ప్రమాదం తెచ్చిపెట్టాయి.
                ప్రపంచంలోని అత్యధిక దేశాలు ఆర్థిక సంక్షోభాల్లో చిక్కుకుని కునారిల్లుతున్నాయి. విద్యార్థులు, యువకులే కాదు వికలాంగులు కూడా వారి కుటుంబాలతో కలిసి ఈ ఆర్థిక సంక్షోభాల నేపథ్యాన్ని వివరిస్తూ నిరసన తెలుపుతున్నారు. ప్రదర్శనలు చేస్తున్నారు. ఆరోగ్య భద్రత, కాంట్రాక్టు సర్వీసుల క్రమబద్ధీకరణ కోసం కార్మిక లోకం దీక్షలు చేస్తున్నది. న్యూయార్క్‌లోపి యూనివర్సిటీల నుంచి ప్రారంభమైన వాల్‌స్ట్రీట్‌ ఉద్యమం ప్రపంచమంతటా పాకింది. పాలక పీఠాలపై కూర్చున్న పెద్దలు బలప్రయోగంతో అణచివేయాలని చూస్తుంటే, ప్రజాఉద్యమాలు వారి కుర్చీలనే కుదిపేస్తున్నాయి. 21 వ శతాబ్దంలో ఊహించలేనంత జ్ఞానం ఉత్పత్తి అయ్యింది. ఉపాధి అవకాశాలు అన్ని రంగాల్లోనూ పెరిగాయి. అయినా ఈ ఆందోళనలు రావడం పాలక వర్గ పార్టీలకు దడ పుట్టిస్తున్నది. కారణమేమిటని పరిశీలించినప్పుడు రెండు అంశాలు స్పష్టమవుతున్నాయి. 1.ప్రపంచ సంపదను జనాభాలో కేవలం 15 శాతంగా వున్న సంపన్నులే అనుభవిస్తుంటే, మిగతా 85 శాతం మంది అల్లాడుతున్నారు. ఆర్థిక అంతరాలు విపరీతంగా పెరిగిపోయాయి. 2. భూమండలమే ప్రమాదం అంచుకు చేరుకోబోతోంది. ప్రకృతిని సంపన్న దేశాలు తమ అవసరానికన్నా మించి వాడుకుని భూగోళం ఉనికికే ప్రమాదం తెచ్చిపెట్టాయి. రుతువులు గతి తప్పాయి. కొత్త రోగాలు పుట్టుకొస్తున్నాయి. వాతావరణంలో పెను మార్పులు చోటుచేసుకుంటున్నాయి. ఆహార భద్రత సమస్య కూడా తలెత్తుతోంది. ఒక వైపున పెరిగిపోతున్న అసమానతలు, మరో వైపున హక్కుల హరణం, నాగరికతల నాశనం చేసే ఎత్తుగడలు యథేచ్ఛగా సాగిపోతున్నాయి. చివరకు పార్లమెంటులో కూడా గుద్దులాటలు, డబ్బు సంచులు పంచుకోవటాలు, ఘర్షణలు, ఒకరిపై ఒకరు దాడిచేసుకునే పరిస్థితి వచ్చింది. ప్రజాస్వామిక వ్యవస్థకు ఇది ప్రమాద ఘంటికలు మోగిస్తున్నది. ఇవన్నీ వాల్‌స్ట్రీట్‌ ఉద్యమానికి హేతువులే.

సోషలిజమే ప్రత్యామ్నాయం.

           సోవియట్‌ యూనియన్‌, తూర్పు యూరోపియన్‌ దేశాల్లో సోషలిస్ట్‌ వ్యవస్థ పతనమై ఇరవై సంవత్సరాలైంది. సోషలిస్టు వ్యవస్థ కూలిపోవడంపై చంకలు గుద్దుకున్న పెట్టుబడిదారీ ప్రపంచం, మరీ ముఖ్యంగా సామ్రాజ్యవాద శక్తులకు ఆ సంతోషం ఎంతో కాలం నిలవలేదు. సోషలిస్ట్‌ శిబిరంలో ఉపద్రవం నెలకొన్న దశాబ్దానికే పెట్టుబడిదారీ వ్యవస్థ కోలుకోలేని సంక్షోభంలో పడిపోయింది. ప్రస్తుత సహస్రాబ్ధి ఆరంభం నుండి సంక్షోభాన్ని చవిచూస్తున్న పెట్టుబడివారీ వ్యవస్థ ఈ సుడిగుండంలోంచి ఎలా బయటపడాలో తెలియక దిక్కులు చూస్తోంది. పెట్టుబడిదారీ అభివృద్ధి చెందిన దేశాల్లో వృద్ధి రేటు క్రమంగా పతనమవుతున్నది. నిరుద్యోగం పెరిగిపోతున్నది. మార్కెట్‌ వ్యవస్థ సంక్షోభంలో చిక్కుకుని విలవిలలాడుతున్నది. షేర్‌ మార్కెట్‌ కుప్పకూలింది. భారీ ఆర్థిక సంస్థలు కూడా పేకమేడలా ఒకటి తరువాత ఒకటి కూలుతున్నాయి. ప్రస్తుత శతాబ్దం మొదటి దశాబ్దంలో అంటే 2008 సెప్టెంబరు మధ్యలో తలెత్తిన ఈ సంక్షోభం 1930 నాటి మహా మాంద్యాన్ని తలపింపచేస్తోంది. పెట్టుబడిదారీ వ్యవస్థకు ప్రత్యామ్నాయం లేదని వాదించిన వారు నేడు తమ ఉనికి కోసం పోరాడాల్సిన స్థితిలో పడ్డారు. ఇందుకు భిన్నమైన పరిస్థితి సోషలిస్టు శిబిరంలో నెలకొంది. సోషలిస్టు వ్యవస్థ తిరిగి మరింత బలంగా పుంజుకుంటున్నది. సోషలిస్టు వ్యవస్థ పతనమైన గడ్డపైనే కమ్యూనిస్టులు గణనీయమైన శక్తిగా తిరిగి ఎదుగుతున్నారు. చైనా కొన్ని సమస్యలు ఎదుర్కొంటున్నప్పటికీ వేగవంతమైన పురోభివృద్ధిని నమోదు చేసుకుంటోంది. ఈ శతాబ్దం మధ్య నాటికి ప్రపంచంలోనే అగ్రశ్రేణి ఆర్థిక శక్తిగా ఎదగగలదని భావిస్తున్నారు. సోషలిస్టు క్యూబా ప్రపంచంలో అతి పెద్ద సైనిక, ఆర్థిక శక్తిగా ఉన్న అమెరికా విధించిన ఆంక్షలను ఎదుర్కొంటూనే ప్రశంసనీయమైన అభివృద్ధి రేటును సాధించింది. అనేక లాటిన్‌ అమెరికా దేశాల్లో వామపక్ష భావాలు గల పార్టీలు అధికారంలోకి వస్తున్నాయి.

భవిష్యత్తు సోషలిజానిదే... !

• ప్రజా ఉద్యమాలను బలోపేతం చేయాలి
• కేపిటలిజం దుర్మార్గానికి తెర దించాలి
• కమ్యూనిస్టు పార్టీల ప్రపంచ మహాసభ ప్రకటన

            పెట్టుబడిదారీ వ్యవస్థ తాత్కాలికంగా ఆధిపత్యం కొనసాగించినా అంతిమంగా భవిష్యత్తు సోషలిజానిదేనని ఇక్కడ ముగిసిన కమ్యూనిస్టు పార్టీల ప్రపంచ మహాసభ ఉద్ఘాటించింది. ఈ నెల 9-11 తేదీల మధ్య ఏథెన్స్‌లో జరిగిన ఈ మహాసభలకు ప్రపంచవ్యాప్తంగా 61 దేశాల నుండి 78 పార్టీలకు చెందిన దాదాపు 400 మందికి పైగా ప్రతినిధులు హాజరై వివిధ అంశాలపై చర్చలు జరిపారు. ఈ మహాసభల్లో పాల్గొనలేకపోయిన దేశాల కమ్యూనిస్టు పార్టీలు తమ సందేశాలను పంపాయి. సోవియట్‌ యూనియన్‌ పతనం తర్వాత గత 20 ఏళ్లలో ప్రపంచవ్యాప్తంగా కమ్యూనిస్టులు ఎదుర్కొన్న అనుభవాలు, ప్రస్తుత అంతర్జాతీయ పరిస్థితులు ప్రధానంగా చర్చల్లో ప్రస్తావనకు వచ్చాయి. పెట్టుబడిదారీ వ్యవస్థ ఎదుర్కొంటున్న సంక్షోభ పరిస్థితులు, సామ్రాజ్యవాద దురాక్రమణ యుద్ధాల వంటి పరిణామాలు ఎదురవుతున్న ప్రస్తుత పరిస్థితుల్లో ప్రజానుకూల అంతర్జాతీయతా వాదాన్ని, సామ్రాజ్యవాద వ్యతిరేక కూటమిని బలోపేతం చేయటం ద్వారా పెట్టుబడిదారీ వ్యవస్థను కూలదోసి సామ్యవాద వ్యవస్థను నిర్మించాలని ఈ మహాసభలు తమ తుది ప్రకటనలో పిలుపునిచ్చాయి. 2008లో సావోపౌలో (బ్రెజిల్‌), 2009లో న్యూఢిల్లీ (భారత్‌), 2010లో ష్వేన్‌ (దక్షిణాఫ్రికా)లలో జరిగిన 10, 11, 12 వ అంతర్జాతీయ కమ్యూనిస్టు పార్టీల మహాసభలు విశ్లేషించి జారీ చేసిన ప్రకటనల్లోని అంశాలను ప్రస్తుత ప్రపంచ పరిస్థితులు ప్రతిబింబిస్తున్నాయని ఈ మహాసభలు తమ ప్రకటనలో వివరించాయి.